محمد عبد المـاجد ☢☢ ..هلال موردة مباراة (الزمن الجميل)

{ مباراة الهلال والخرطوم الاخيرة التي لعبت في ستاد المريخ ..كانت مناسبة جميلة لأن يبدع فيها لاعبي الهلال...ويقدموا فصول امتاعهم للجماهير التي صبرت معهم الشوط الاول كله والهلال يخرج مهزوما 0-1.

{ نعم ما فعله فريق الخرطوم بالهلال في الشوط الاول جاءوا لاعبو الهلال وعوضوا عنه جماهيرهم في الشوط الثاني بعرض رائع واهداف خمسة.

{ كأننا كنا نستمع لمحمد وردي في رائعة الدوش (الحزن القديم).

ولا الحزن القديم

إنتِ

ولا لون الفرح

إنتِ

ولا الشوق المشيتْ بيهو

وغلبْنى أقيف

وما بِنْتِ

ولا التذكار ولا كُنْتِ

بتطْلَعِى إنتِ من غابات

ومن وديان...

ومنى أنا..

ومِن صحْيَة جروف النيل

مع الموجَهْ الصباحيَّه

ومن شهقَة زهور عطشانَهْ

فوق أحزانهْا

متْكَّيهْ

بتَطْلَعى إنتِ من صوت طِفلَهْ

وسط اللمَّهْ منْسيَّهْ

{ عارفين البتطلع من صيحة جروف النيل مع الموجة الصباحية ..ومن زهور عطشانة فوق احزانها متكية ..ومن صوت طفلة وسط اللمة منسية دي شنو؟.

{ دي تمريرة البرنس.

{ الموضوع دا عاوز ليه قعدة.

{ تمريرة البرنس ..المعز بقي يجيب منها قون.

{ طبعا كالعادة عاوزين تغالطوا.

{ انتوا ما شفتوا في ضربة الجزاء الاولي ..هيثم مصطفي (حفظه الله ورعاه) مسك الكورة ونادي المعز.

{ اها البركة كانت في (المسكة) دي.

{ المعز لقي السكة سالكة ..كورة يمسكها هيثم مصطفي ما تجي قون.

{ انتوا بتلعبوا وإلا شنو؟.

{ الفيفا مفروض تحسم الموضوع دا.

{ هيثم مصطفي تمريريتو ...زي (فاجأني النهار)..المهاجم لو ما صاحي من النباه الاول ..ما بستوعبها.

فاجأنى النهار

وأنا ماشى بيناتا

أتساقط باقي حنين

لسه عيونك ياها عيونك

تكسر باب الدم السرى

وتجرى تنعس عشب القلب

وتبكى سماهو فراش

يا ناعس بين الخلوه وريحة الصندل

فلت الطين ... النيل قصاها ضفيرتو

وشراها رماد ... وفجا حنين

{ فاجأني النهار ..اغنية عقد الجلاد التي فاجأنا بها الراحل مجدي النور ..الذي تفاجأنا يوم ان رحل في حادث حركة اليم ...فشاع بيننا الحزن ومده الي اجل غير مسمي.

{ وتمريرة هيثم تشبه (فاجأني النهار).

{ يعني بالواضح كدا (المهاجم) لو ما كان شاطر في (الجغرافيا) ما بعرف يتصرف مع (التمريرة).

{ بتلخبط ..ويقعد يطقطق في اصابعينه.

{ قالوا ليك المعز محجوب بعد هدفه في فريق الخرطوم ..بقي يفكر في لقب الهداف.

{ وقالوا ليك المعز بقي يدرب علي الضربات الرأسية ..بعد ان اجاد ضربات الجزاء.

{ هيع.

{ المعز بنافس هنو.

{ انتوا وين الاسم دا؟.

{ هسع بعد يومين بنسمع بي اعارته الي (ليبيا).

{ ليبيا ذنبها شنو؟.

{ طبعا المعز في حتة الاهداف دي ما بقدر علي كاريكا.

{ عشان كدا قال خلوا لي هنو؟.

{ الليلة رأيك شنو يا بكري المدينة تعمل لينا ضربة جزاء ..عشان نرفع رصيد المعز من الاهداف.

{ تعالوا نرجع لمباراة الهلال والخرطوم.

{ في الشوط الاول من المباراة رغم خسارة الهلال كان واضحا ان الهلال سوف يعود وكانت (الفرص الضائعة) عنوان لفوز عريض سوف يحققه الهلال في الشوط الثاني.

{ لذا كانت ثقة جماهير الهلال في لاعبي الهلال كبيرة ..لم يتوقفوا من المساندة ولم يتعجلوا النصر حتي كانت الخماسية المقنعة التي جعلت الفاتح النقر لاول مرة يخرج بعد المباراة ولا يهاجم التحكيم.

{ يقول شنو لكن.

{ قول طرد فييرا ما صحيح.

{ المضحك الفاتح النقر قال دفاع الهلال فيه خلل.

{ انت يا الفاتح النقر ..دفاعك التمام دا ...دخلن فيه 5 اهداف.

{ انت كنت لاعب بي دفاع حي العرب.

{ اول مرة اعرف الدفاع البتدخل في شبكتو 5 اهداف ..افضل من الدفاع البستقبل هدف وحيد.

{ يا الفاتح النقر ..لو دا كلامك ..احسن تهاجم التحكيم.

{ يا الفاتح النقر كلامك دا تاني ما تقولوا.

{ انتوا عارفين (سادومبا هو لب لب) عمل في سفاري كدا ليه؟.

{ اقول ليكم ..اكيد انتوا ما عارفين.

{ سادومبا كان فاكر (سفاري) الصغير ...(سفاري) الكبير.

{ يعني في سوء تفاهم صغير حصل.

{ سادومبا افتكر (سفاري) الخرطوم ..هو ذاتو سفاري المريخ.

{ يا سادومبا الموضوع (خوة) ساكت ..نحن بنقول ليك كدا ..عشان ما يتلخبط عليك الاختصاص.

{ لكن الحاجة الكويسة في مباراة الهلال والخرطوم هو ان الفاتح النقر ..لم يهاجم حكم المباراة.

{ مع اعتقادي ان الخرطوم استفادت من حكم المباراة وهو يطرد علاءالدين يوسف في وقت مزعج ...كان يمكن ان تستفيد الخرطوم من ذلك.

{ الذي يهمنا هنا ان الهلال قدم مباراة كبيرة واستطاع ان يسجل في الشوط الثاني 5 اهداف...اضف الي ذلك ان الروح المعنوية عند لاعبي الهلال كانت عالية ووضح فيهم الانسجام والروح الطيبة ..فكان الفرح حاضر بصورة مشهودة.

{ اليوم يلعب الهلال مباراة تكفل له الصدارة باذن الله وتوفيقه اذا انتصر الهلال علي الموردة ..لترد الصدارة الي الهلال بشكل رسمي.

{ صدارتنا ..ورجعت لينا.

{ الليلة الوصيف..بتوصف بشكل رسمي.

{ صفونة عديل الليلة.

{ الموقع الطبيعي للمريخ.

{ جمال الوالي (اتنحي) عشان اللحظة دي.

{ قالوا ليك عبدالله حسن عيسي الدفع كتر عليه ..فكر (يتنحي)..قاموا قالوا ليه بنعير وارغو.

{ ترتاح من المرتب والنثريات والشقة والعربية.

{ المهم عندنا اليوم هو حضور جماهير الهلال ليشهدوا هذه الليلة التي سوف يكون الطرب فيها كبيرا.

{ مباراة اليوم تكسب اهمية كبرى ..والانتصار اليوم يمنح الهلال دافع معنوي عظيم.

{ كفي ان الانتصار اليوم سوف يجعل الهلال يلعب مباراة الاتحاد بطيب خاطر..وطيب الخواطر في كرة القدم امر مهم.

{ ما نريده في مباراة اليوم هو ألا يلعبوا بتهاون او تراخي تحسبا لمباراتهم الاحد القادم امام الاتحادي الليبي.

{ اللعب بتهاون وتراخي يؤدي الي الاصابات ..والخوف من الارهاق واللعب علي الواقف يجعل لاعبو الهلال اكثر قابلية للارهاق.

{ لذا فانه من الضروري ان يلعب لاعبو الهلال اليوم امام الموردة بمسؤولية وان يجتهدوا ليكون انتصارهم اليوم هو الانتصار الاكبر.

{ كذلك تقديم عرض راق اليوم ..يجعل الجمهور اكثر ثقة بالتمدد الهلالي في مباراة الكونفدارلية القادمة ..لا سيما وان فريق الموردة صاحب مدرسة ونكهة خاصة واداء جميل.

{ عليه كل المقومات متوفرة لتكون مباراة اليوم مباراة تحكي عن الروعة ..والجمال ..فقط مطلوب من لاعبي الهلال ان يبعدوا مباراة الاتحاد من تفكيرهم ..وان لا يكون انكماشهم او تهاونهم تحسبا لمباراة الاحد.

{ فكروا كليا في مباراة اليوم ..وحاولوا ان تقدموا الروائع والدرر في المباراة تضمنوا اجادة واتقان وانتصار في مباراة الاحد القادم امام الاتحاد الليبي ان شاءالله.

{ الهلال لو استطاع ان يحسم مباراة اليوم من الشوط الاول يمكن في الشوط الثاني ان يريح 3 من لاعبي الهلال ...وتتاح الفرصة لثلاثي اخر تكون مشاركته في المباراة استعداد لهم لمباراة الاحد.

{ لكن في كل الاحوال اتمني ألا تتم اراحة هيثم مصطفي او مهند الطاهر اللذان يقدمان في هذه الايام ..السهل الممتنع ..ويطربان الجميع بالاداء والفن ..الذي يذكرني بايام (عبدالحميد يوسف).

{ منتهي الموسيقي.

{ منتهي الروعة.

{ وكل الجمال.

{ مطلوب شكر وتشجيع اضافي للاعبي الهلال في مباراة اليوم..فتشجيعكم افضل زاد للاعبي الهلال لمباراة الاتحاد.

{ كذلك لا بد ان يكون هناك شكر علي وجه خاص لهيثم مصطفي ومنهد الطاهر ..لأن الروعة كلها حاضرة في اقدامهم.

{ الشيء الملاحظ ان الكثير من لاعبي الهلال في حالة تألق هذه الايام ..بداية من المعز محجوب ...ثم سامي عبدالله ..وهيثم ومهند وكاريكا ..حتي بكري المدينة الذي يلعب دقائق معدودة ..لكن مع ذلك يضع بصمته ..واللاعب الموهوب يستطيع ان يقول كلمته حتي لو شارك 5 دقائق.

{ ترقبوا بكري المدينة ..فهو علي موعد ان شاءالله مع النبوغ.

{ ملحوظة: ادخلوا بدري.

هوامش

{ الكلمة الان ..لا كلمة صلاح ادريس ..ولا كلمة الكاردينال ..ولا حتي مالك جعفر.

{ الكلمة الان كلمة هيثم والمعز وعمر بخيت.

{ اسعاد جماهير الهلال مسؤولية لاعبي الهلال.

{ الداخل لمشاهدة مباراة للهلال ..هو من دون شك خارج باذن الله وتوفيقه سعيد.

{ مجلس ادارة نادي الهلال مطلوب منه ألا يستجب للاستفزازات الخارجية.

{ المجلس همه الاول بطولة الكونفدرالية.

{ وبطولة الكونفدرالية لن تكون إلا عبر عزل لاعبي الهلال من الصراعات وابعادهم ومنحهم حقوقهم.

{ واعتقد ان المجلس حقق نجاحا كبيرا في هذه الامور.

{ بتذكروا لاعب اسمه العجب.

{ العجب في الايقافات الافريقية ..ما اتذكروه.

{ انت يا العجب ..الكابتن انت وإلا موسي الزومة؟.

{ يا جماعة مصطفي جعفر الحارس الذي يلعب تحت السن وقفوه.

{ انت يا العجب قاعد وين؟.

{ دورك شنو؟.

{ علي الاقل ..اذا لم تشارك في هذا الخروج كان تحسم اولئك الذين خرجوا من السلوك القويم.

{ مصطفي جعفر ..يا العجب ما قادر تحسمو.

{ فعلا فريق المريخ يحتاج الي قائد.

{ يا فيصل العجب ...وقت (بيان) ما عاوز تتطلعوا ..(اتنحي).

{ التنحي دا صعب.

{ فييرا قال سوف يسجل صاروخ في مرمي رمزي.

{ انت يا فييرا قالوا ليك رمزي برجع تاني.

{ رمزي صالح دا ..زي المشي يناضل في حتة تانية.

{ قنع من النضال في عطبرة.

{ عارفين رمزي لو كان مشي بورتسودان ..كان طخوه.

{ ناس بورتسودان ديل جنهم وجن الحارس الغريب.

{ الواعد شريف الفحيل ..يشارك في كل مناسبات الهلال..امس تواجد في تمرين الهلال..وكان حضوره (لفتة) هلالية رائعة من نجم ينتظره الكثير.

{ شريف الفحيل ..بدأ من حيث انتهي الاخرين.

{ يعني بدأ من السر قدور طوالي.

{ خبر عاجل : الليلة الكورة دي ما فيها (حافز) طاير ..اقصد (حافز) محول.

» عبد المولى الصديق .. هلال موردة واشياء اخري
» محمد عبد المـاجد . ☢☢ • ناس بتلعب مع (اتحاد) ليبيا..وناس مع (اتحاد) مدنى البرنس والغزال (تضحيات) غير قابلة للتعليق
» :: مافيش احسن من كده يا هلال ::
» محمد عبد الماجد .☢☢ .. شكرا..الامانة وصلت